jueves, 17 de marzo de 2011

SEMANA SANTA EN GUAREÑA

 Luis Chamizo,poeta extremeño, nacido en Guareña. Como buen extremeño admira la Semana Santa y sus experiencias,vividas en su pueblo natal, nos la deja en sus escritos.


                  SEMANA SANTA EN GUAREÑA


Eja que lo cuente como me dé maña,
qu'en en jamás jué'l muchacho pal pueblo
pa Semana Santa.
Y endispués que lo iga,ya puedes
endilgale en las cosas cristianas
y enseñale bien el Catecismo
pa que no barbarice a sus anchas.
Cuéntalo, muchacho; ¿qué pasa pol pueblo
por Semana Santa?

-Pos verá osté, padre, pasan muchas cosas;
yo no sé si sabré yo explicalas:
anti to, lo qu'a mi más me gusta
son las prucesiones: ¡qué cosas más maja!;
unas parigüelas mu grandes,mu finas,
mu bien jatiadas,
y en lo arto una Virgen mu moza,mu güena, mu santa,
qu'asín me lo icían tós los que pol pueblo la prucesionaban.

Iban mucha gente,con velas mu largas,
en dos carrefilas po los enceraos pa dale compaña;
y en medio curas y tamién ceviles
con las escopetas a la funeraria,
poe si alguno de mala nacencia
juera osao en llegar a insultala.

¡Que Vigen más güena, que Virgen más moza qué Virgen más santa!...

Al pasá po la casa e los ricos,
¡pumba!, s'encendían toás las luminarias,
y cantaban los mozos cantares,
esos cantarcinos que pol pueblo andan, que agora es la möa,
que hacen gorgoritos y hacen mojigangas
como los trinios de las golondrinas
que mus despabilan cuando viene'l alba.
Y al pasà po la casa e los probes,
tamién había luces dando luminaria:
luces de pitrolio qu'apagaba el aire;
quinqueses, candíles en toas las ventanas,
que pacecían relamiase de gusto
al pasá la Virgen elante e su casa.

Y pa mi qu'a Ella no debía gustarle
la lus elertrina pa que l'alumbrara:
¡la lus elertrina, tan seria, tan fosca,
con sus alambraos y sus maquinarias,
y con sus celipas y con sus tornillos
que d'un gorpe encienden y d'ungorpe apagan!

¡La Virgen, la Virgen!... Ella dende arriba
de las parígüelas que la porteaban,
lo mesmo a los ricos, lo mesmo a los probes,
a tós los miraba con la mesma cara;
y...¡qué corcí! a mi me parecía
qu'a nusotros mejó nos miraba,
paecíendo icirnos con aquellos ojos cuajaos e lágrimas:
¡Peirme, muchachos, peirme con gana,
pa que Dios sus concedaa vusotros lo que os jaga falta!





Y yo l'he peïo a esa Virgen tan gúena y tan santa,
a esa Virgen,que ya no m'acuerdo cómo la mentaban,
qu'e arremate mu pronto esa guerra
y que pare e llover,`porque'lagua,
que mus quita trebajo a los probes,
est´jorobando to´ta la senara.
¡Yo no sé qué será de nusotros
comosiga metío'l tiempoen agua,
y en Melilla sigan los hombres mandones
trillando las grancias!...





Yo tamién lo qu'a mi más me gusta
es cuando se juntan dmbos en la plaza,
la Virgen aquella y el Resucitao.
¡Chacho, qué estropicio cuando me la estapan!...
Al bori sin bori, prencipian los curas,
y tlon tlon, tolón tolón, toitas las campanas,
ytachinda, chinda, tós los de Pulio,
y las escopetas jarriando descargas,
y.... estas cosas, padre, no son pa contao,
no son pa explicalas;
tié osté qu'ir otro año pa velas,
tí osté qu'ir con mi madre y mi hermana,
pa enterase de toas las cositas
que pasan pol pueblo por Semana Santa.

No hay comentarios:

Publicar un comentario